In Dark The snaw has been fa'in the hale day lang And the drift is blawin' across the lea Een wee Robin Redbreast has stopped his sang And wae like cowerin' neath the holiy tree And aye when stowlin's I keek oot At the snaw flakes sae saft and licht I turn wi' a seech for I doot, I doot My laddie will no be here the nicht. It's four lang miles and the burn tae cross By the wee fit briggie below the mill Syne the road twines round by the aul' peat moss An' up the side o' the eerie hill Yet rowed in his plaid he may venture oot For he is a callant baith young and wicht And he weel kens the road but I doot, I doot I needna look for him here the nicht. The very last time that he was here Oor auld man boded the storm was nigh An I said Ye winna be back I fear Till the dreadful doonfa' o' snaw is by But he lichtly said as he turned aboot For aince my lassie ye arena richt Fat care I for snaw but I doot, I doot My laddie will no be here the nicht. My mither says he'd be het at hame Gin he trauchle thro' drift for a kiss or twa An' my sister tells me, I micht think shame To haud him widin' sic depths o' snaw. Says faither kindly "Ye needna pout Big on some peats noo, and trim the licht." His biddin' I dee but I doot, I doot My laddie will no be here the nicht. I tak my shank an' sit doon wi' a sigh It's lang by his time and he'll nae be here Oh I wish the winter sae snell were by An' the spring time come a' oor hearts to cheer Then in the gray gloamin I coold steal oot An' meet wi' my true love wi' nane in sicht By the burnie side - but I doot, I doot My laddie will no be here the nicht. But look at aul' collie, he's aff to the door His towsie tail waggin' a welcome kin He hears a fit he has heard afore Or his neuk o' the ingle he widna tine' An' here is the form sae manly and stoot The ruddy cheeks an the een sae bricht I'm sure I winner fat gart me doot I micht weel hae kent he wad be here the nicht. from Grieg-Duncan Folk Song Collection, vol 4. p 183 SOF
Thanks to Mudcat for the Digital Tradition!